આણંદ, તા. 10 ઓક્ટોમ્બર 2019, ગુરુવાર
આણંદ શહેરના લાંભવેલ રોડ ઉપર એસ.કે.સિનેમા પાસે સવારના સમયે આંગડીયા પેઢીના રોકડા રૂા.૪૬ લાખ લઈને બાઈક ઉપર સવાર થઈ જઈ રહેલ પિતા-પુત્ર પાસેથી બે થી ત્રણ જેટલા બાઈક સવાર લૂંટારૂઓ દ્વારા બાઈક અટકાવી બાઈક ઉપરનો થેલો તફડાવીને લૂંટ કરી ફરાર થઈ જતા સમગ્ર શહેરમાં ભારે સનસનાટી મચી જવા પામી હતી.
આ અંગેની પ્રાપ્ત માહિતી અનુસાર આણંદ નજીક લાંભવેલ ખાતે માનસી સોસાયટીમાં રહેતા તેમજ આણંદના ગામડીવડ પાસે બળીયાકાકા રોડ ઉપર વી.પટેલ નામની આંગડીયા પેઢી ધરાવતા કાંતિભાઈ ઠક્કર તથા તેમનો પુત્ર સવારના સમયે બાઈક લઈને ઓફિસે જઈ રહ્યા હતા. તેમની પાસે થેલામાં રોકડા રૂા.૪૬ લાખ હતા. જે તેઓ થેલામાં લઈ બાઈકના સ્ટેયરીંગ ઉપર ભરવીને જઈ રહ્યા હતા.
તે દરમ્યાન તેઓ એસ.કે.સીનેમા પાસેથી પસાર થઈ રહ્યા હતા ત્યારે અચાનક બાઈક ઉપર ત્રણ જેટલા શખ્શો આવી ચઢ્યા હતા તથા તેમનું બાઈક અટકાવી રૂા.૪૬ લાખ ભરેલા થેલાને બાઈક ઉપરથી તફડાવીને જોત-જોતામાં ફરાર થઈ ગયા હતા. જો કે આ ઘટના બનતા કાંતિભાઈ ઠક્કરે બુમાબુમ કરી મુકતા આજુબાજુથી લોકો દોડી આવ્યા હતા તથા રસ્તા ઉપર અવર-જવર કરનાર વાહનો સહિત આજુબાજુના વિસ્તારમાં તપાસ કરતા લૂટારૂઓ ક્યાંય રફુચક્કર થઈ ગયા હતા.
આ મામલે આણંદ ટાઉન પોલીસ મથકે જાણ કરતા ડીવાયએસપી સહિત ઉચ્ચકક્ષાના પોલીસ અધિકારીઓ દોડી આવ્યા હતા તથા સમગ્ર આણંદ જિલ્લા સહિત આણંદ શહેરમાં રસ્તાઓ ઉપર સઘન બંદોબસ્ત સાથે નાકાબંધી કરી શહેરના જુદા જુદા વિસ્તારોમાં મુકવામાં આવેલ સીસીટીવી કેમેરાના ફુટેજના આધારે તપાસનો ધમધમાટ શરૂ કરી દેવામાં આવ્યો છે. જો કે સ્થાનિકો દ્વારા તેમજ કાંતિભાઈ ઠક્કર દ્વારા જણાવ્યા અનુસાર ત્રણ જેટલા લૂંટારૂઓ હેલ્મેટ તથા બુકાની બાંધી પલ્સર બાઈક લઈને આવ્યા હોવાનું જાણવા મળ્યું હતું.
from Kheda anand News - Gujarat Samachar : World's Leading Gujarati Newspaper https://ift.tt/3212Cm5
ConversionConversion EmoticonEmoticon